老餅話你知 Vol.4

老 餅 遊 記 

美國三州十天遨遊 

老餅十六歲卜卜脆已去了加拿大讀書，期間大假定在美加各地遊玩。回港後因職業關係，到處遨遊；除了非洲外，都冇也邊洲未去過。今次專攻美國西岸，現將途中見聞及靚相，與大家分享：

行程：SANTA MONICA / LOS ANGELES / LAS VEGAS/SAN FRANCISCO 

Santa Monica(聖達蒙尼卡) 是 Los Angeles(洛杉磯/又名羅省)傍一個很出名的小城鎮，醫神陳奕迅去過都話好玩。

此張陳奕迅相scan自香港的報紙 
背境是當處的Pacific Park遊樂場 

第一站：Santa Monica 及 Los Angeles 
本來想訂香港來回洛杉磯的機票，但中天遨遊的經理鄭小姐好好人，話比老餅知坐全日空(All Nippon Airways)由香港去洛杉磯，跟住由三藩市返香港原來一樣價，又可玩多一個地方，不用走番轉頭，真好。鄭小姐重幫我全程訂了路口位，令我這嬌人的二百磅身軀，可以向旁偷位，十多小時也挨得住。

由香港至日本，老餅就幸運地坐了這架卡通機。超 cutie !

香港六號上午上機，四小時十五分到日本東京，停大約四小時，食碗麵，坐多十小時便到洛杉磯，當地六號上午十一點到步。嘩，如果不回港，我就多了半日命! 
到了洛杉磯入住市中心金融區的 Wilshire Grand Hotel, 兩星半價錢，超三星酒店；嘩，一個字 -- 正 !

到左酒店，搞掂入住手續，入到間超靚房，見到張超靚的 king size 大床，真係好想訓番陣；但係小小引誘，老餅頂得住。咬實牙根去個超靚廁所洗個凍水面 -- 醒神。即刻落街往聖達蒙尼卡出發。因酒店在市中心，街口已有巴士站，坐 20 或 720 號巴士(US$1.25)，差不多一小時就到。

在聖達蒙尼卡，好玩的有三部份：

加洲最大的沙灘 -- 不用多講，去到自然會忍唔住跳落水，游完水租單車，沿海喪踩等下海風吹乾個人，一樂也 ! 

Pacific Park -- 一個在海邊的超好玩遊樂場，老餅推介，一路玩過山車一路向下望住個海，超激 !

第三街 (3rd Street Promanade) -- 老餅幾十年來去過無數步行街，最正都算這裡，又有人當街表演，又係一個字 -- 正 ! 

日 頭 好 旺 夜 晚 重 旺 

在第三街有一間玩具店，專賣手辦人形及 Action figures，美國的卡通及漫畫角式，講得出都有，有印象但講唔出都有。差Ｄ唔記得講，間舖叫 Puzzle Zoo。

街尾有一個不太大但超正的商場，裡面的 Food Court 勁多野食；中、日、意大利、美式不在話下，重有墨西哥，重有蒙古菜；但老餅就鐘意坐在路傍的露天茶座，一手熱狗一手凍啤，嘩，今次有個新字 -- 嘆 !

 
Santa Monica Mall 

在第三街見到架極 cutie 的車仔，睇真真原來係垃圾車，真係服左Ｄ美國佬，鬼唔知咁多人去玩啦，又唔見香港政府整番幾架在步行街用！ 

九月七日，一早由酒店去機場接"老SAM"的機。他是老餅在一九七二年到加拿大認識的第一個朋友。以譚校長計法，我們倆老今年加起來岩岩好五十歲。老SAM好夠雷，知我到美國西岸玩，即由加拿大東岸飛過來會合。廢話小講，去租番架車先。為左慳錢，唔去Budget、Avis、Hertz 等等，搵左間都算十名內的租車公司；去到間野，淨係果個 counter 已嚇死人，唔知以為入左機場，唔信？Look 下下面張相。

室外室內停車場二百幾架車，眼都花，卒之揀左架外型仿古，但顏色係 blue 得來又 chrome ，肥肥地，真係cutie 又潮爆果隻 ! 

上車前記得前後左右望真架車有冇刮花或撞凹，好，乜事都冇。因為去賭城 Las Vegas 要經沙漠，死人都開冷氣試下先，勁凍；再試下台 CD 機，夠大聲，好掂 !兩個超齡 hippes 互望，喪笑十秒，開車 。第一站羅省，我來了 ！

下期待續~~

-老餅
2004/10/31